പെണ്ണ്

വീട്ടകങ്ങളിൽ പെണ്ണ്
എരിയാതെയെന്നും
നിറഞ്ഞ് കത്തണം
തീൻ മേശയിൽ
മനമറിഞ്ഞു വിളമ്പണം
കിടപ്പറയിൽ
അധിപയാകരുത്
അടിമയാകണം
നിലാവിലേക്ക്
ജനൽ തുറക്കുകയേ അരുത്
മഴയെ പ്രണയിക്കരുത്
മഞ്ഞു തുള്ളിയെ മോഹിക്കരുത്
മണ്ണട്ടി വീഴും വരെ
കല്പനകളൊ നിർദ്ദേശങ്ങളോ
ഇല്ലാത്ത
അനുസരണ മാത്രമാകണം 

എത്ര ആലോചിച്ചിട്ടും...

മണ്ണപ്പം ചുട്ടപ്പോഴും
ഒളിച്ചേ കണ്ടേ കളിച്ചപ്പോഴും
ഞങ്ങൾക്കിടയിൽ
ജാതിയും മതവുമില്ലായിരുന്നു
വീടുകൾക്കിടയിൽ
വേലികളും
പിന്നീടെപ്പോഴാണ്
ഞാന്‍  മുസ്ലിമും
അവർ ഹിന്ദുക്കളുമായതെന്ന്
എത്ര ആലോചിച്ചിട്ടും .......

ഒളിച്ചുകളി

ഒളിച്ചുകളിയിൽ
ഞാനെപ്പോഴും പിടിക്കപ്പെടും
ഇരുണ്ട അകത്തളങ്ങളിൽ
പത്തായത്തിൽ
കോണിച്ചോട്ടിൽ
എവിടെ ഒളിച്ചാലും
അവരെന്നെ കണ്ടുപിടിച്ചു
ഒരിക്കൽ
എല്ലാവരെയും കണ്ടുപിടിച്ച്
കളിയിൽ ജയിച്ചപ്പോഴേക്കും
പെറ്റിക്കോട്ടിൽ
ചുവന്ന പൂക്കൾ വരച്ച്
കാലം
ഇരുട്ടിലെക്കെന്നെ
ഒളിച്ചുകടത്തി 

വീട്ടാക്കടം

കടം വാങ്ങിയ പണം
കൊടുത്തു തീർത്തു
വീട്ടാകടങ്ങൾ
എന്നിട്ടും ബാക്കി
ഒരുരുളച്ചോറ്
അലിവുതുന്നിയ ഒരു നോട്ടം
നിറംമാഞ്ഞ ഒരുടുപ്പ്‌
ഹൃദയം തൊട്ട സാന്ത്വനം
ഇതൊക്കെയും
 കൊടുത്തു തീര്ക്കാൻ മാത്രം
സമ്പന്നയല്ല ഞാനിന്ന് 

പ്രണയം

നിന്‍റെ
പ്രണയത്താൽ
ചുറ്റപ്പെട്ട ദ്വീപിൽ
തടവിലാണ് ഞാനിന്ന്
ഒരുനാൾ
ഇതത്രയും കുടിച്ചുവറ്റിച്ച്
ഞാൻ
മരണത്തിലേക്ക്
ഒളിച്ചു കടക്കും

വിപരീതം

പൂവിനെ
സ്നേഹിച്ചപ്പോഴൊക്കെ

മുള്ളുകൊണ്ട്
പോറലേറ്റു 

മഴയെ
പ്രണയിച്ചപ്പോഴൊക്കെ  

വേനലിൽ
പുകഞ്ഞു  നീറി 

നിലാവിനെ
മോഹിച്ചപ്പോഴൊക്കെ 

ഇരുട്ടിന്റെ ഗഭപാത്രത്തിലുറങ്ങി 

കാടുകാണാനിറങ്ങിയപ്പോഴൊക്കെ 

മരുഭൂമി കണ്ടു മടങ്ങി.......